Кентау қаласында Қожа Ахмет Ясауидың рухани-философиялық мұрасын кеңінен насихаттауға арналған «Ясауи керуені» ғылыми-танымдық семинары өтті.

Іс-шараға мемлекеттік органдардың өкілдері, ғалымдар, теологтар, дінтанушылар, зиялы қауым өкілдері мен жастар қатысты.

Семинарды «Әзірет Сұлтан» ұлттық тарихи-мәдени қорық-музейінің директоры Ерлан Дәкенов жүргізді.

Жиында Түркістан облысының Дін істері басқармасының басшысы Рүстем Сабыржанұлы сөз сөйлеп, Ясауи мұрасын зерттеу мен насихаттаудың, жастардың тарихи-рухани танымын арттырудың маңыздылығына тоқталды.

Семинар барысында профессор, теология ғылымдарының докторы Досай Кенжетай, дінтанушы Сержан Оразбай, «Яссауитану» ғылыми-зерттеу институтының директоры Бауыржан Сайфунов және философия докторы Төлеген Мұхит баяндама жасады.

Спикерлер Ясауи мұрасының тарихи және рухани маңызы, хикметтеріндегі адамгершілік құндылықтар, ұлттық сана мен салт-дәстүр сабақтастығы туралы ой бөлісті.

Қатысушылар Қожа Ахмет Ясауи мұрасын жастар арасында кеңінен насихаттау, ұлттық құндылықтарды дәріптеу және қоғамдағы рухани тұтастықты нығайту бағыттары бойынша пікір алмасты.

«Ясауи керуені» жобасы алдағы уақытта Түркістан облысының өзге де қала-аудандарында жалғасын табады.