Қазақстан – көпұлтты, көпконфессиялы мемлекет. Ел халқының түрлі этнос өкілдері мен дін ұстанушылары бейбіт өмір сүріп келе жатқаны – біздің еліміздің басты құндылықтарының бірі. Бұл – оңайлықпен келмеген жетістік. Мемлекетіміздің жүргізіп отырған салиқалы саясатының, халықтың саналы көзқарасының, дін өкілдерінің өзара түсіністігінің нәтижесі.

«Ырыс алды – ынтымақ» деген қазақ халқы қай дәуірде де татулықты ту еткен. Бүгінде елімізде ислам, христиан, иудаизм, буддизм секілді түрлі діндерге сенушілер өмір сүреді. Бұл діни сан алуандылық – қоғамдық тұрақтылыққа қауіп емес, керісінше, байлыққа айналуы тиіс. Ол үшін конфессияаралық келісім мен өзара сыйластықты сақтай білу маңызды.

Соңғы жылдары әлемде діни экстремизм мен радикализмнің күшеюі көптеген елдердің ішкі бірлігіне сынақ болып отыр. Қазақстан мұндай қауіптің алдын алу үшін барынша кешенді саясат жүргізіп келеді. Қоғамда түрлі дін өкілдерінің ашық диалог орнатуы, өзара құрмет пен төзімділік принциптерін ұстануы – осы бағыттағы маңызды қадамдар.

Елімізде әр үш жыл сайын өткізілетін Әлемдік және дәстүрлі діндер көшбасшыларының съезі – Қазақстанның дінаралық татулықты нығайтудағы рөлінің жарқын дәлелі. Бұл форумда түрлі дін жетекшілері бір үстел басында отырып, жаһандық мәселелер бойынша пікір алмасады. Мұндай бастама әлем бойынша сирек кездесетін тәжірибе.

Сонымен қатар, елімізде діни бірлестіктермен байланыс жөніндегі кеңестер, Дін істері басқармалары, Ақпараттық-түсіндіру топтары тұрақты жұмыс істейді. Бұл құрылымдар халық арасында діни сауаттылықты арттыруға, жастардың жат ағымдарға ілесуінің алдын алуға бағытталған жұмыстарды іске асыруда.

Конфессияаралық келісімді сақтау – тек мемлекет пен дін басыларының міндеті емес. Бұл – әрбір азаматтың, әсіресе, жастардың парызы. Жастар діни сенімге байланысты өзгелерге сыйластықпен қарап, ұлттар мен діндер арасындағы келісімді сақтай білуі қажет. Қоғамдық өмірге белсенді араласып, ел болашағына үлес қосуы – шынайы отансүйгіштіктің белгісі.

«Түрлі дін – бір Отан» қағидаты – біздің мемлекетіміздің бейбіт даму жолындағы темірқазығы. Бұл тек ұран емес, нақты әрекетке негізделген идеология. Біз әртүрлі дін өкілдері бірлік пен өзара түсіністік негізінде өмір сүргенде ғана еліміздегі тұрақтылықты, бейбітшілікті сақтап қала аламыз.

Бейбітшілік пен келісім – әрбір азаматтың жүрегінде бастауы бар құндылық. Оны бағалау – баршамыздың ортақ міндетіміз.

Қазіргі әлемде діни алауыздық салдарынан туындаған қақтығыстар мен қайшылықтар жиі орын алуда. Мұндай жағдайда дінаралық татулықты сақтау – кез келген мемлекет үшін өмірлік маңызды мәселе. Қазақстан – бұл бағытта әлемге үлгі бола алатын мемлекеттердің бірі. Біздің елде түрлі дін өкілдері бейбіт, сыйластықта өмір сүріп келеді.

Қазақстанда ислам, христиан, иудаизм, буддизм секілді ірі әлемдік діндер мен дәстүрлі наным-сенімдердің өкілдері өзара түсіністікте өмір сүруде. Бұл – еліміздің саналы саясатының, азаматтық жауапкершіліктің және зайырлы қағидаттардың жемісі.

Әлемдік және дәстүрлі діндер көшбасшылары съезінің Астанада тұрақты өтуі – Қазақстанның тек өз ішінде ғана емес, жаһандық деңгейде де дінаралық диалог орнатуға үлес қосып жатқанын көрсетеді.

Тарих көрсеткендей, ұлттар мен діндер арасындағы түсінбеушілік пен алауыздық соңы қантөгіске, мемлекет тұтастығының бұзылуына әкелуі мүмкін. Ал татулық пен бірлік бар жерде даму, өсіп-өркендеу болады. Сондықтан әрбір азамат діни айырмашылықты емес, ортақ құндылықтар мен Отанға деген сүйіспеншілікті жоғары қоюы керек.

Жастар – елдің ертеңі. Сондықтан олардың бойында діни төзімділік, түрлі сенім иелеріне құрметпен қарау мәдениетін қалыптастыру – аса маңызды. Мектептер мен жоғары оқу орындарында дінтанулық білім беру, діни сауаттылықты арттыру – дінаралық татулықты сақтаудың басты жолдарының бірі.

Дінаралық татулық – ел бірлігінің, бейбітшіліктің және тұрақты дамудың кепілі. Әр адам бұл құндылықты бағалап, оны сақтауға үлес қосуы тиіс. Біздің мақсат – әртүрлі сенім иелерінің бір шаңырақ астында тату өмір сүруі. Осы арқылы Қазақстан әлемге татулықтың, келісімнің, өркениетті үнқатысудың үлгісін көрсетіп келеді.

 

  Г.Бекжан

Түркістан облысы дін істері басқармасы

«Дін мәселелерін зерттеу орталығы» КММ           

теолог маманы