Қоғамдық тұрақтылық пен ұлттық тұтастықтың берік тіректерінің бірі – дәстүрлі дін. Қазақстандағы діни ахуалдың ерекшелігі – сан ғасырдан бері қалыптасқан рухани құндылықтарымыздың Ислам дінімен астасып, халқымыздың өмір сүру салтына айналуында. Бұл ұстаным бүгінгі күні де мемлекеттің зайырлы дамуымен үндесе отырып, қоғамның бірлігіне негіз болуда.

Дәстүрлі дін – діни сенім мен ұлттық менталитеттің сабақтас тұсы. Қазақ халқы Ислам дінін ерікті түрде қабылдап, оны өз салт-дәстүрімен үйлестіре білген. Бұл ерекшелік ұлттың болмысын сақтауға, адамгершілік қағидаттарға сүйенген тәрбие мен руханиятты дамытуға зор үлес қосты. Бүгінгі таңда діни сенім – тек жеке адамның еркі емес, сонымен қатар қоғамдық келісім мен ұлттық келісімді қалыптастыратын маңызды құрал.

Қазақстан – көпұлтты, көпконфессиялы ел. Осы тұрғыдан алғанда, қоғамдағы әртүрлі дін өкілдерімен өзара түсіністік пен сыйластықта өмір сүру – ұлттық тұтастықты бекемдеудің алғышарты.

Мемлекет тарапынан дәстүрлі дінге қолдау көрсету, дін саласындағы заңнамаларды жетілдіру, ақпараттық-түсіндіру жұмыстарын жүргізу – діни сауаттылықты арттырып, ел бірлігін сақтауға бағытталған нақты қадамдар. Осыған орай, діни ұйымдар мен мемлекеттік органдардың өзара ықпалдастығы қоғамда рухани қауіпсіздікті қамтамасыз етуде шешуші рөл атқарады.

Қазақстан халқының тарихи-мәдени тамыры мен рухани болмысы ғасырлар бойы ислам дінімен үндесе дамып келеді.  Осы тұрғыда дәстүрлі дін – ел ішіндегі татулық пен бірлікті сақтаудың басты негіздерінің бірі. Қазіргі заманда рухани тұрақтылықтың сақталуы үшін халықтың діни сауаттылығы жоғары деңгейде болуы шарт. Дәстүрлі дініміз – адамзаттық құндылықтарды дәріптейтін, адамгершілік пен әділдікті негіз еткен сенім жүйесі. Ол отансүйгіштік, үлкенге құрмет, кішіге ізет, ата-ананы қадірлеу, еңбекқорлық сияқты қасиеттерді өмір салтына айналдыруды көздейді.

Мемлекетіміздің зайырлы сипаты дін мен мемлекеттің әр салада өзара тәуелсіздігін қамтамасыз еткенімен, рухани бағыттағы тұрақтылықты қамтамасыз ету үшін мемлекет пен діни бірлестіктер арасында сындарлы диалог орнаған. Бұл ынтымақтастық – әлеуметтік келісім мен ұлтаралық татулықты сақтауға мүмкіндік береді.

Жастардың діни сенім мәселесінде дәстүрлі бағытты ұстануы – болашақтағы ұлттық бірлік пен тұрақты дамудың кепілі. Осыған байланысты мектептер мен жоғары оқу орындарында зайырлы біліммен қатар, рухани-адамгершілік тәрбие беру – маңызды мәселе.

Дәстүрлі  дін – халқымыздың тарихи, мәдени және рухани өзегіне айналған маңызды құндылық. Ол – ұлттық бірлікті нығайтып, қоғамда келісім мен татулықты орнықтыруға негіз болатын сенімді тірек. Сондықтан, дін мен дәстүр сабақтастығын сақтау – әр азаматтың ортақ парызы.

Қорыта айтқанда, дәстүрлі діни құндылықтар қоғамда үйлесімділік пен тұрақтылықты қалыптастыруда шешуші рөл атқарады. Ұлттық руханияттың өзегі – дін мен дәстүрдің үндестігі, бұл – қазақ елінің бейбіт болашағы мен біртұтас мемлекет ретінде қалыптасуының негізі.

 

 Ұ.Тұрсын

 

Түркістан облысының дін істері басқармасының 

«Дін мәселелерін зерттеу орталығы»

КММ-нің маманы