Қателесу – ол норма. Өмірде қателеспеген, жаза баспаған жан жоқтың қасы екені айдан анық. Алайда әрбір қателесуші пенде қатесін түсінген кезде, оны түзетуге асығуы, құлшынып тұруы өзінің келешегі үшін жақсы болмақ.

Адам баласы болған соң кез-келген істі кемеліне жеткізіп, мейілінше идеалды түрде жасауға тырысып бағатынымыз бар. Әрекетімізді жасап, артынан нәтижесін тез күтуіміз де адамның табиғатында бар дүние. Бірақ бәрі біз ойлағандай керемет бола бермейтінін бірі түсінсе, бірі түсінбес. Адамның емес, Алланың қалауы болады деген осы шығар. Осыған қатысты «Сен асықты екен деп, Алла әмірін өзгертпес» деген Абай атамыздың сөзі бар.

Адам туылған сәтінен бастап жаман болып туылмайды. Адамның нашарлануына, жаман жаққа өзгеруіне көптеген себептер бар. Айта кетсек, біреуден немесе жақындарынан жәбір көруі, психиканы бұзатын фильмдер, видеолар қарап, оған еліктеулері, жат ағымдардың керемет өмірді уәде етіп насихаттауы секілді т.б. себептер бар. Өмірде қиыншылық көріп өскен адам, жарқын болашағы үшін кез-келген қадамға барады. Осыны пайдаланған жат ағым өкілдері діни түсінігі төмен, жат ағымға қарсы иммунитеті нашар адамдарға қаржылай қомақты қаражат ұсынып, қайтарымына жасырын қызмет атқаруын, өздерінің діни насихаттарын қарапайым халыққа жүргізуін талап етеді. Құрыққа түскен адамның санасын улап, «намаз оқымаған адам кәпір, салт-дәстүр дінімізге қарама-қайшы» деген секілді сөздерді айтып, өзінің отбасына, жақын тума-туыстарына және Қазақстан мұсылмандары діни басқармасы бекіткен имам-ұстаздарға қарсы қояды.

Білмей жатып, анық-қанығына көз жеткізбей, кез келген ақпаратты тұтына беру түбі жақсылыққа әкелмейді. Тіпті темір тордың арғы жағына түсу қаупі бар. Мейілінше дереккөздерді дұрыстап зерттеп, рұқсат етілген сайттардан ақпарат алған жөн. Алла Тағала Құранның «Нахыл» сүресі, 43-аятында: «Егер білмесеңдер, білім иелерінен сұраңдар», – деп айтқан. Сондықтан, бір нәрсені түсінбеген жағдайда түсінгенше қайта-қайта сұрауға ұялмай, дұрыс ақпаратты білуге талпынған жақсы.

Жат ағымның жетегінде кеткен бауырларымыз түпкі ниеттерін түзеп, жақындарымен үзілген байланысты қайта жалғап, тура жолға түсуге ұмтылса көкірегінен ешкім итермесі анық.

Хадисте: «Нағыз мұсылман – өзгеге қолымен де, тілімен де зиян тигізбеген адам», – делінеді.

Пайғамбарымыздың «Барлық адам баласы қателесуші, қателесушілердің жақсысы тәубәға келгендері» дегеніндей және қазақтың «Жаңылмайтын жақ жоқ, сүрінбейтін тұяқ жоқ» деп айтқан қанатты сөзі бекерден-бекер айтылмаса керек. Жақсылық жасауда жарысатын, өзгеге және елдің пайдасы үшін игі істер атқаратын адамдардың болуы жарқын болашаққа жетелейді. Әрбір жан бақытты сәттерінің көп болуына, бақытты ғұмыр кешуіне әбден лайық!

 

М.Серікұлы

 

Теолог маман