Кездесу барысында студенттермен еліміздегі діни ахуал туралы пікір алмасылып, діни білімнің маңыздылығы, дәстүрлі ислам құндылықтарын насихаттау, жастар арасында теріс діни ағымдардың алдын алу мәселелері жан-жақты түсіндірілді. Сонымен қатар қазіргі қоғамдағы діннің рөлі, рухани тәрбие және білім алудың жауапкершілігі туралы маңызды ойлар ортаға салынды. Сондай-ақ бітіруші курс студенттеріне мекемедегі ваканттық жұмыс орындары туралы мәліметтер берілді.

Түркістан облысы дін істері басқармасының «Дін мәселелерін зерттеу орталығы» КММ-нің директоры Медет Халықов өз сөзінде «Заң мен тәртіп» қағидатын ілгерілету мақсатында дін саласына қатысты ақпараттық-түсіндіру жұмыстарын жүргізудің маңыздылығына тоқталып, жастардың діни сауаттылығын арттыру қоғам тұрақтылығының негізгі кепілі екенін атап өтті. Сондай-ақ ол радикалды көзқарастардан сақ болуға шақырды.

Ал «Сарыағаш» медресе-колледжінің директоры Дінмұхаммед Сманов студенттерге білім алуда табандылық танытып, ел игілігі үшін қызмет ететін білікті маман болып қалыптасудың маңызын жеткізді.

Іс-шара өзара пікір алмасу форматында өтіп, қатысушылар үшін мазмұнды әрі пайдалы болды.