Dеструктивті діни ағымның жақтаушысы жауапқа тартылды
Dеструктивті діни ағымның жақтаушысы жауапқа тартылды
22.09.2020
734
0

Солтүстік Қазақстан облысында экстремистік материалдарды сақтағаны және таратқаны үшін деструктивті діни ағымның жақтаушысы жауапқа тартылды, – деп хабарлайды Polisia.kz.

Солтүстік Қазақстан облысы ПД Экстремизмге қарсы іс-қимыл басқармасының қызметкерлері «ВКонтакте» әлеуметтік желісіне мониторинг жүргізу барысында діни мазмұндағы аудиофайлдар мен фотоматериалдарды тарату фактісін анықтады. Жедел-іздестіру іс-шараларын жүргізу барысында жазбалардың авторы анықталды. Ол бұрын сотталмаған Петропавлдың 33 жастағы тұрғыны болып шықты. Деструктивті діни ағымдардың бірін ұстанған әйел жеке парақшасында аудио мен фотоны орналастырған.

«СҚО ПД ЭҚІҚБ қызметкерлері дін заңнамасы саласында құқық бұзушылықтарды анықтау бойынша тұрақты негізде жұмыс жүргізеді. Тұрғындардың деструктивті діни ағымдарды ұстанушылар қатарына қосылып кетуін болдырмау үшін алдын алу жұмысы жүргізіледі. Қазіргі уақытта жаңа ұстанушыларды өз қатарына тарту негізінен мессенджерлер мен әлеуметтік желілер арқылы жүзеге асырылады. Ағымға тартушы адам сақтықпен әрекет етеді. Дей тұрғанымен, жыл басынан СҚО аумағында дін саласында 13 құқық бұзушылық анықталды. 8 құқық бұзушы әкімшілік жауапкершілікке тартылды, қалғандарына дінтану сараптамалары тағайындалды», -деді СҚО Полиция департаменті бастығының орынбасары Руслан Назаров.

Аталған факті бойынша ҚР Әкімшілік құқық бұзушылық туралы кодексінің 453-бабы 2-бөлігі (Бұқаралық ақпарат құралдарының өнiмiн, сол сияқты өзге де өнiмдi Қазақстан Республикасының аумағында дайындау, сақтау, әкелу, тасымалдау, тарату) бойынша материал жинастырылды. Тіркелген контент ҚР Ақпарат және қоғамдық даму министрлігінің Дін істері жөніндегі комитетіне дінтану сараптамасына жіберілді. Сарапшылардың қорытындысы бойынша материалдар экстремистік болып шықты және оларды ел аумағында тарату мен сақтауға тыйым салынған.

Петропавл қ. Мамандандырылған әкімшілік сотының шешімімен құқық бұзушы ҚР ӘҚБтК 453-бабы 2-бөлігі бойынша жауапқа тартылды. Оған 20 айлық есептік көрсеткіш көлемінде айыппұл салынды.

0 пікір